Тошкентда Рио-де-Жанейродан қайтган миллий паралимпия терма жамоаси тантанали кутиб олинди.

Ўзбекистон оммавий ахборот воситалари хабар бершларича 21 сентябр чоршанба куни тонгда миллий паралимпия терма жамоаси Рио-де-Жанейродан Тошкентга етиб келди. Пойтахт аэропортида спортчиларни ҳукумат ва Миллий олимпия қўмитаси вакиллари, яқинлари ва кўп сонли мухлислари кутиб олди. Паралимпия рамзлари билан безатилган иккита даблдекер спорт делегациясини Ўзбекистон пойтахти кўчалари бўйлаб Миллий паралимпия ассоциациясига қадар элтиб қўйди.

Эслатиб ўтамиз. Ўн икки кун давомида Бразилиянинг Рио-де-Жанейро шаҳрида бўлиб ўтган XV Паралимпия ўйинларида терма жамоамиз аъзолари 8 та олтин, 6 та кумуш ва 17та бронза медаллари билан умумий 31 та медаль жамғардилар ва умужамоа ҳисобида 176 та давлат вакиллари орасида медаллар сифати бўйича 16-ўринни, сони бўйича эса 13-ўринни эгаллашди. Бунақаси тарихда ҳеч қачон бўлмаган эди.

32 та иштирокчи 31та медални қўлга киритиши бу чинакам мўжиза. Демак натижалар шуни кўрсатаяптики спортчилар сонига нисбатан медаллар жамғариш борасида Ўзбекистон делегацияси 96,8 фоиз натижа кўрсатиб XV Паралимпия ўйинларида энг яхши кўрсаткичга эга бўлди. Шуни алоҳида эътироф этиш керакки юртимиз паралимпиячилари Марказий Осиё давлатлари орасида биринчи, МДҲда Украинадан сўнг иккинчи, Осиёда Хитой ва Эрондан сўнг учинчи ўринни эгалладилар.

Журнал тахририяти.